 Ҳайдовчи борки, автомашинасига фақат сифатли бензин қуйишни хоҳлайди. Бугунги кунда ёнилғи сифатини текшириб берувчи қурилмалар ҳам мавжуд. Бироқ аксарият юртдошларимиз бундай қуримага эга эмас. Хўш, бу ҳолда келгусида двигатель билан боғлиқ нохуш вазиятлар келиб чиқмаслиги учун автомобилимизга қуяётган ёнилғи сифатини қандай текшириш мумкин? Бу борада мутахассислар тавсия этган маълумотларни илиндик... Билиб қўйган яхши Двигателнинг қуввати ҳамда унинг ишлаш муддатини ошириш мақсадида ёнилғи таркибига турли қўшимчалар қўшилади. Бундай қўшимчалар эса кимёвий ва органик қўшимчаларга бўлинади. Кимёвий қўшимчалар ёнгандан кейин двигателнинг ички деворларида атмосфера ва атроф-муҳит экологияси учун зарарли бўлган чиқитларни ҳосил қилади. Бундай қўшимчалар одатда жуда арзон ва двигатель қувватини етарлича оширса-да, унинг хизмат муддатини камайтиради. СИФАТИНИ АНИҚЛАШНИНГ 6 УСУЛИ 1. Албатта,тажрибали ҳайдовчилар бензиннинг сифати ёмонлигини автомашинанинг тортиши ўзгаришидан ёки двигателда тез ёниши (детонация ҳосил қилиши) каби ҳолатлардан аниқлаб олади. Сиз танлаган ёқилғи қуйиш шахобчасидаги бензиннинг сифатли эканига ишонч ҳосил қилиш учун уни оддий шароитда ҳам жуда осон, аммо самарали йўллар билан синаб кўриш мумкин. 2. Кимёвий хоссасига кўра, бензин рангсиз суюқлик, бироқ А-76 бензинида бошқа қўшимчалар мавжуд бўлса, А-95 ёки А-98 бензинларига қараганда анча хирароқ кўринишда бўлишини кўпчилик билса керак. 3. АЁҚШга келдингиз... Ёнилғи қуювчи пистолетни олиб, уни бак оғзига қўйишдан олдин пистолет қувурининг ички деворига бармоғингизни теккизиб кўринг. Агар бензинга солярка ёки октанлар миқдорини оширувчи қўшимчалар қўшилган бўлса, текширган жойингиздаги ёғ доғлари бармоғингизга ўрнашиб қолади. Бармоқда бундай доғлар қолмаса, демак, ёнилғи таркибига ҳеч нарса аралаштирилмаган. 4. Бензин сифатини текширишнинг осон йўлларидан яна бири оддий оқ қоғозга бензин томизилади. Томизилган бензин жойини енгилгина пуфласангиз, у осонгина буғланиб кетади. Агар қоғознинг бу жойи яна асл ҳолига келса, демак бензин сифатли. 5. Оддий шароитда бензин сифатини аниқлаш учун яна бир қанча мураккаб бўлмаган синовлардан ҳам фойдаланиш мумкин. Масалан, бир неча томчи бензинни қўлингизга суринг. Агар бензин сурилган жой тезда қуриб қолганини ҳис қилсангиз, бу бензин таркибида ҳеч қандай қўшимча моддалар йўқлигидан дарак беради. 6. Бензинни шаффоф идишга қуйинг. Ҳеч қандай қўшимчаларсиз тоза бензин тиниқ бўлади. Идишда у хира кўринса, ёнилғи сифатсиз. БИЛАСИЗМИ? Юртимизда автомобиль двигателлари учун АИ-91, АИ-95, АИ-98 маркали бензинлар ишлатилади. Бензин маркасидаги "А” ҳарфи бу автомобиль бензини эканлиги, "И” ҳарфи эса октан сонини аниқлаш услубини (тадқиқот услуби), ҳарфдан кейинги рақамлар октан сонини кўрсатади. Ёнилғининг октан сони қанча катта бўлса, унинг детонацияга мойиллиги шунча кам ва сиқилиш даражасини ошириш мумкин бўлади. Бу эса двигателнинг қуввати ва тежамлилигини оширади. АИ-98 дан (барча мавсумлар учун) бошқа ҳамма бензинлар ёзги ва қишкиларга бўлинади. Қишки бензинлар ёзги бензинлардан қайнаш (буғланиш) ҳарорати (бензин массасининг 10—90%) анча пастлиги билан фарқ қилади.
Manba: www.SheJoT.CoM - Saytdan olindi!
| 
