Актёр Маъруф Отажонов туркиялик киношуносларнинг эътиборига тушди (видео) - 26 Ноября 2020

Онлайн всего: 12

Гостей: 11

Пользователей: 1

Kun faolllari:
iphone, ArthurApark, Kenneththalo, joannace2, rosellakc1, brandify18, martinhi4, loisbd11, kenyara69, cynthiank2, nicholaskl69, loumb16, lorenavv69, zelmalg2, rosenu4, InvillCousa, Zuvilsdrese, jeniferma60, sabweino

ПОИСК / IZLASH:

Актёр Маъруф Отажонов турк кино юлдузи Бурак Ўзчивит билан биргаликда «Қурилиш: Усмон» деб номланган тарихий сериалда мўғул императори Гейҳату ролини ижро этмоқда.

Маъруф Отажонов «Дарё» мухбири Феруз Муҳаммадга берган интервьюсида ушбу ролга ҳеч қандай кастингларсиз танлаб олингани ҳақида гапириб берди.

«Туркияда менинг Фарҳод Бадалов деган шогирдим бор эди. Бир куни телефон қилиб қолди, менинг Амир Темур ролида ўйнаганимни режиссёрга айтганлигини ва суратимни юборишимни сўради. Сурат юбордим, кейин «Эртагаёқ самолётда учиб келишингиз шарт экан», деди. «Тўхта-тўхта, нима гап ўзи?» дедим. «Бу ерда турклар «Қурилиш: Усмон» номли сериал суратга оляпти. 28 та давлат билан шартнома тузилган. Сизни гап-сўзсиз қабул қилишди. Ҳеч қанақа кастингдан ўтмайсиз. Ролингиз жуда ҳам зўр, лекин 3 кунлик съёмкангиз бор», деб айтди.

Шу шогирдим Фарҳоднинг гапи билан Туркияга бордим. Туркияда ўзимизнинг актёрларни ҳам кўрдим. «Мендирман Жалолиддин» сериали ижодкорлари, дўстларимиз кутиб олишди. Дўстларим Боир Холмирзаев, Тоҳир Саидов хурсанд бўлиб, «Сиз шунақа сериалга олинибсиз», деб табриклашди.

Ўзим эса иккиланиб тургандим. Динимиз бир бўлиши мумкин, лекин тилда муаммо бўлиши мумкин деб ўйладим. 10 кунча тайёрланиб оламан деб ҳам режалаб олган эдим. Лекин 10 кун эмас, 3 кундан кейин съёмкага чақиришди.

Матнни беришди, қўлимга матнни олганимда мени қўрқув босди. Буни эплай олмаслигимни билдим. Бу мўғул императори образи экан, жуда катта шов-шувга эга роль экан. Битта нарса менга далда бўлди: «Мен ўзбекман, ўзбекистонликман. Мен Ўзбекистоннинг актёриман, шу ерда тарбия топдим. Менда ғурур деган нарса бор», деб ўзимга ўзим тинмасдан қайтариб турдим. Бу нарсани ички монолог дейишади. Қайси миллатдан бўлишидан қатъи назар, мени ҳурмат қилиб чақирдими, мен ҳеч қачон миллатимни пастга урмайман.

Тил билмайман десам, кетишим ҳам мумкин эди, лекин ўйнайман, дедим. Мен ўзбек актёрининг қанақа кучга эга эканлигини қўлимдан келгунча кўрсатишни ўзимга мақсад қилдим.

Хуллас, бордим. 200 дан ортиқ одамдан ташкил топган жамоа. Ҳаммаси турклар. Уларнинг кўзидан билиниб турибди, менга жуда катта ишонч билдиришган. Келиб бирма-бир танишишяпти. Мен фалончиман деб исмини айтяпти, «Мен Маъруфман» дейман. «О Маъруф аби, Маъруф аби», дейишди. Мени яхши қабул қилишди.

Съёмкамни тугатдим, эртасига телефонларда Туркиянинг бир каналида реклама кетяпти. Мен ҳам пайдо бўляпман. Ҳайрон қоляпман, тавба, кечагина ўйнаган нарсам. Яна тўғридан-тўғри турк тилида гапиряпман.

30-қисмда ўйнаган ролим унча катта эмасди. Лекин ҳажм томондан катта эди. Кейин режиссёр навбатдагисига чақириб, «Маъруф аби, кўрдингми? Хурсандмисан?» деди. «Хурсандман, хурсандман», дедим. «Биз ундан-да хурсандмиз», деди.

Мени таклиф қилган Фарҳод Бадалов олдида уни уялтириб қўймаганимдан хурсанд бўлдим. Чунки уларнинг олдида Фарҳод катта ҳурматга эга экан. У бизнинг у ердаги бошлиғимиз ҳисобланади. Менда Фарҳод уялмасин, деган нарса турибди. «Устозимни чақирдим, шарманда қилиб қўймасин» деган ўй билан юрган бўлса-чи, деган нарса доим хаёлимдан ўтиб турарди. Аллоҳга беҳисоб шукр, бу нарса бўлмади. Уларда ўзимга нисбатан кўпроқ қизиқиш уйғотдим.

Маъруф Отажонов, актёр, режиссёр»

Айни кунларда «Қурилиш: Усмон» тарихий сериали намойиш этилаётган ATV турк телеканалининг «Instagram» саҳифасида актёр Маъруф Отажонов ижросидаги мўғул императори ролини эътироф этган.

Маълумот учун, актёр Маъруф Отажонов «Мирзо Улуғбек. Осмон тоқига қўйилган нарвон» ҳужжатли фильмида Амир Темур ролини ижро этган. Бундан ташқари, у рус кинематографлари томонидан суратга олинган бир қанча сериалларда турли даражадаги ролларни ҳам ижро этган.