«Алданган аёл» кастингидан ўтолмаган Нигора, Тахмина образидан қуруқ қолган Дурдона. Фильм ва сериаллардаги машҳур ролларни турли сабабларга - 3 Марта 2022

Бир фильмнинг суратга олиниши учун озмунча вақт ва меҳнат сарфланмайди. Баъзан бир рол учун ўнлаб ижодкорлар курашади. Улар ичида энг яхши деб тан олинганларига эса ролни ижро этиш насиб этади. Айрим ҳолларда эса актёрлар фильм кастингидан ўтиб, турли сабабларга кўра ўша ролни ижро эта олмаслиги ҳам мумкин. Қуйида шундай ҳолатлар ҳақида сўз юритамиз.

Дурдона Қурбонова масъулиятсизлиги сабаб ролдан четлатилган

«Миллий» телеканали орқали намойиш этилган «Дайди қизнинг дафтари» сериалида бош қаҳрамон образига дастлаб Дурдона Қурбонова тасдиқланган эди. Бироқ ушбу образ ёш актриса Фотима Бердиевага насиб этди. Дурдона Қурбонова нима сабабдан Тахмина ролини ижро этмагани ҳақида сериал режиссёри Умид Ҳусанов сўзлаб берди.

— Ҳақиқатан ҳам бу ролни Дурдона Қурбонова ижро этиши керак эди. Сериал продюсери Дониёр Агзамов актриса билан келишгач, сценарийни қўлига тутганмиз. Унга рол моҳияти, нималарга алоҳида эътибор бериши кераклиги ҳақида тушунтиргандим. Бир неча бор қўнғироқ қилганимизда ундан сценарийни ўқияпман, деган жавобни олдик. Аммо суратга олиш жараёнлари бошланишига бир ҳафта қолганида продюсерга қўнғироқ қилиб: «Қаҳрамонимнинг исми нима эди?» деб сўраган. Ундан аввал ҳам персонаж имижи бўйича учрашувга чақирганимизда турли баҳоналар билан келмаганди. Бундан продюсернинг жаҳли чиқиб, ролни бошқа актрисага беришимизни сўраган. Ўз-ўзидан иккинчи номзод Фотима Бердиевага қўнғироқ қилиб, ролга тасдиқланганини айтганмиз, — дейди Умид Ҳусанов.

Нигора Каримбоева «Алданган аёл» фильми кастингида иштирок этган

Таниқли актриса Нигора Каримбоева «Алданган аёл» фильмидаги бош қаҳрамон роли учун кастингда иштирок этган. Аммо бу образни Райҳон Уласенова ижро этган.

— «Алданган» аёл фильмининг фотокастингида иштирок этганман. Албатта, бош ролни ижро этиш хоҳиши бўлган. Аммо ролга тасдиқланмаганимни эшитиб, бироз ранжиганман. Аммо фильмни томоша қилгач, бу рол меники эмаслигини, Райҳон Уласенова аъло даражада ижро этганлигини англадим. Аммо Аюб Шаҳобиддиновнинг «Кечиккан ҳаёт» фильмидаги Дилноза Кубаева ижро этган рол меники бўлиши керак эди. Дилнозани ҳурмат қиламан. Уни синглимдек яхши кўраман. Аммо ундан ролни ростмана қизғанганман. Бу ролни мен ижро этишим керак эди, деган ижод рашки анча вақтгача тинчлик бермаган, — дейди Нигора Каримбоева.

«Сени излаб» фильми ижодкорлари бош ролни ҳаваскор актрисага ишонган

Ўзбек киносининг ретро фильми «Сени излаб» да бош ролга ҳаваскор актриса Наргиза Олимова тасдиқланган. Аслида, бу рол учун Лола Элтоева, Мадина Мухторова каби профессионал актрисалар ҳам кастинг топширган. Фильм кичкина қизалоқнинг ойисига жуда ўхшайдиган бегона аёлни кўчада кўриб қолиши саҳнасидан бошланади. Қизча етти ёт бегона аёлни (Наргиза Олимова) ўз онасидек қабул қилади ҳамда отасининг саъй-ҳаракатларига қарамай, ундан айрилишни хоҳламайди. Фильм сўнгида улар она-болага айланади...

— Актриса эмасман, аммо кино оламига кириб келишим жуда қизиқ кечган. 1988 йил «Тошкент маликаси» гўзаллик танловида қатнашганимдан сўнг, кўплаб телелойиҳаларга таклифлар бўлган. Орадан бир муддат вақт ўтиб Саида Зуннунованинг «Гўдак иси» номли ҳикоялари асосида фильм олинадиган бўлибди. Кастингга таклиф этишди, ҳамма қатори иштирок этдим. Рости, фильмда иштирок этишни умид қилмагандим.

Чунки мен билан бирга Мадина Мухторова, Лола Элтоева каби яхши актрисалар ҳам кастинг топширишганди. Аммо кастинг видеоларини кўрган ёзувчи Саид Аҳмад Наргизанинг қиёфасида ўзбек аёлини кўряпман, деб ролга мени танлабди. Шундан кейин фильм муваффақиятли чиқиши учун чин дилдан ҳаракат қилдим. Фильмда Мадина Мухторовага Нодира роли насиб қилди, — дейди фильмдаги бош рол ижрочиси Наргиза Олимова.

Малика Алимова «Осмондаги болалар»даги Лола ролига тасдиқланган эди

Зулфиқор Мусоқовнинг «Осмондаги болалар» фильмидаги барча болалар ошиқ бўлган Лола образи дастлаб Малика Алимовага, Наргиз роли эса Кристина Тоировага аталган эди. Бироқ съёмка жараёни бошланишидан бироз аввал режиссёрнинг фикри ўзгаради ҳамда Малика ва Кристина ўзаро рол алмашади.

— «Осмондаги болалар» фильми суратга олинишидан аввал Лола ролини ижро этишим ҳақида айтишганди. Аммо суратга олиш куни келгунига қадар режиссёр Кристина Тоирова ва менга айнан қайси ролларни ижро этишимизни айтмади. Ҳайрон бўлиб, ролларни такрорлаб ўтиравердик. Кристина ёлғизликни ёқтирарди, мен эса мактаб ўқувчилари билан тезда тил топишиб кетгандим. Шунда Зулфиқор ака Кристина Лолани, Малика эса Наргиз ролини ижро этиши керак, деган экан. Чунки Наргиз роли билан ўхшашлик жиҳатларимиз бисёр. Шундай қилиб, Лола роли менга насиб этмаган, аммо бундан ҳеч қачон афсусланмайман, — дейди Малика Алимова.

Наргиза Абдуллаеванинг ролини Ситора Фармонова «илиб кетган»

2006 йили «Ўзбектелефильм» киностудиясида «Мафтуна» номли сериал суратга олинган. Рассом йигитга кўнгил қўйган талаба қиз тақдир тақозоси билан етим боланинг бошини силашига тўғри келади. Аммо буни одамлар турлича талқин қилишади. Актриса Ситора Фармонова ижросидаги Мафтуна роли аслида Наргиза Абдуллаевага насиб этиши керак эди. Аммо суратга олиш ишларига бир неча кун қолганида актриса ролдан мосуво бўлган. Наргиза Абдуллаева нима сабабдан бундай бўлганини яхши билади, аммо оммага ошкор этишни истамайди.

«Бахт овчиси»даги Зуляни Нигора ижро этиши керак эди

«Бахт овчиси» сериалидаги Зуля роли «Афандининг қизлари» жамоаси аъзоси Нигора Абдуллахоновага топширилганди. Аммо сериал съёмкаси бошланишига бир неча кун қолганида режиссёр қароридан қайтган. Нигора ҳам истеъдодли актриса, у бир неча фильмларда бош ролларни маромига этказиб ижро этган. Аммо Барчин Ғофурова ижросидаги Зуля томошабинларни кўпроқ таъсирлантирган.

Баҳора Арслонова «Дугоналар» кўрсатувидаги иштироки туфайли орзусидаги ролни ижро эта олмади

— Режиссёр Иброҳим Расулов шоира Зулфияхоним ҳақида «Муҳаббат баҳори» номли фильмни суратга олмоқчилигини айтиб, кастингга таклиф этди. Орадан анча вақт ўтди, мен кастингга жиддий тайёргарлик кўрдим. Шоиранинг ҳаёт ижодини ўрганиб, Жиззахга ҳайкалини ҳам зиёрат қилиб келдим. Кастингда энг таъсирли эпизодни ижро этиб, маза қилдим.

Режиссёрга кастингдан ўтмасам ҳам, хабар беринг қўйинг, дегандим. Орадан анча вақт ўтиб, фильм суратга олинаётгани ҳақида эшитдим. Энг ёмони, ўша ерда Баҳора ролни яхши ижро этди, фақат у «Дугоналар шоу» кўрсатувида иштирок этгани учун уни ролга олмадик, дейишибди. Кўрсатув билан фильмнинг нима боғлиқлиги бор, деб ҳайрон бўлдим. Актриса Шаҳноза Шокирова Зулфия ролини маромига етказиб ижро этган, аммо бу ролни чин дилдан меники бўлишини истагандим, — дейди Баҳора Арслонова.