«Чолиқуши» — ўзбек томошабинлари томонидан севиб кўрилган илк турк сериали. Бир-бирига ошиқ Фериде ва Камроннинг оғир тақдирига ачиниб, миллионлаб мухлислар кўзига ёш келган. Хўш, томошабинларни экранга михлаб қўйган гўзал жуфтликнинг ҳаёти аслида қандай кечди? Улар ҳозир нималар билан банд, деган саволларга қуйида жавоб топишингиз мумкин.
Бош ролларни ижро этган Фериде ва Камрон бутун дунё бўйлаб машҳурликка эришди. «Чолиқуши» сериали турк адабиёти классикаси Рашод Нури Гунтекин қаламига мансуб роман нинг иккинчи экранлаштирилган нусхаси эди. Биринчи фильм 1966 йилда намойиш этилган, аммо 1986 йилги мини-сериал бутун дунёда шуҳрат қозонган. У дунёнинг юздан ортиқ мамлакатларига сотилган ва Туркияда ҳанузгача машҳур. У ҳозир ҳам экранларда тез-тез намойиш этилади ва 2013 йилда машҳур фильмнинг ремейки ҳам суратга олинди. Янги «Чолиқуши» ўзидан олдинги сериалнинг шон-шуҳратига соя солмади. 1986 йилги мини-сериалнинг асосий мавзуси ислом жамиятидаги аёл ҳаёти, аср бошида бузила бошлаган анъаналар, эркак ва аёл муносабатларида янги тенденцияларнинг пайдо бўлиши ҳақида эди. Қолоқ қарашларга қарши исён кўтарган бош қаҳрамон кўп синовлардан ўтиши керак, лекин у ўзининг севгиси ва мустақил ҳаёт ҳуқуқини ҳимоя қилишга муваффақ бўлади. Турк аёллари бу сериални катта иштиёқ ва миннатдорчилик билан қабул қилган.
1986 йилда суратга олинган «Чолиқуши» сериалида суратга тушган актёрлар томошабинлар меҳрини қозонди, шунингдек, уларнинг тақдири қандай кечгани ва ҳозир нима билан бандлиги барчага қизиқ.
Айдан Шенер – Фериде паранжи кийишни хоҳламаган
Айдан Шенер 23 ёшида ушбу сериалда бош рол — қайсар Феридени ўйнади. 18 ёшида «Чолиқуши» телесериалининг бўлажак юлдузи «Туркия гўзали» танловида ғолиб бўлган, дунё миқёсида гўзаллик танловида ўз ватанини ҳимоя қилган. Шундан сўнг унга реклама роликлари ва телекўрсатувлар учун таклифлар тушгани ажабланарли эмас. Аммо унга ҳақиқий шон-шуҳратни «Чолиқуши» сериали олиб келди. Сериал исломий жамиятда яшашга мажбур бўлган ва ҳеч қандай ҳуқуққа эга бўлмаган қизнинг оғир йўли ҳақида ҳикоя қилади. Бу мавзу турк аёлларига таниш эди, шунинг учун «Чолиқуши» сериали дарҳол машҳурликка эришди. Айданнинг сўзларига кўра, хурофот билан курашадиган қаҳрамони унга руҳий жиҳатдан жуда яқин эди: «Мен мусулмонман, мен Худога ишонаман, Аллоҳ билан алоқам борлигини ҳис қиламан... Лекин рўмол ўрашда, ҳатто паранжи кийишда бирор маъно кўрмаяпман. Аллоҳ менга гўзаллик берган бўлса, нега уни яширишим керак?.. Мен тенглик тарафдориман».
Бироқ актрисанинг севимли турмуш ўртоғи, қизиниг отаси унинг туғилган кунига паранжи совға қилган.
Актриса турмуш ўртоғи билан 8 йил яшади ва бу йиллар давомида унинг эри гўзал рафиқасини қаттиқ рашк қилиб, ундан актрисалик карьерасини тўхтатишини ва уйда қолишини талаб қилди. Афтидан, паранжа сўнгги нуқта эди: улар ажрашишди ва Айдан бошқа турмушга чиқмади, гарчи унинг сўзларига кўра, янги турмуш борасида кўплаб таклифлар бўлган бўлса ҳам. У «Чолиқуши»дан кейин кўп роллар ўйнади, аммо у қадар муваффақиятга эришмади. XXI асрнинг бошларида у экранлардан ғойиб бўлди. Актриса томошабинларга қари кўринишни истамагани ҳақида миш-мишлар ҳам пайдо бўлди, лекин аслида Айданнинг кўриниши ҳозир ҳам ажойиб, у худди ёшликдагидек гўзаллигича қолган. Унинг асосий фаолияти инсон ҳуқуқларини ҳимоя қилиш ва уйсиз ҳайвонларга ёрдам беришдир. У вақти-вақти билан телекўрсатувларда кўриниш бериб туради.
Кенан Калав — Камрон қамоқдан чиққанидан кейин ҳам суратга тушди
Кенан Калав 25 ёшида Фериденинг севгилиси ролини ўйнаган. У «Чолиқуши» сериалида суратга тушгандан сўнг янги таклифларга умид қилганди, бироқ натижа кутилганидек бўлмади. Кейинчалик маълум бўлишича, 1990 йилда Кенан Испания чегараларида ҳибсга олинган. У гиёҳванд моддалар контрабандаси билан шуғулланган ва Испанияда бу жиноят жуда қаттиқ жазоланган. Суд ҳукмига кўра, актёрга 10 йиллик қамоқ жазоси берилган. Тўғри, у 6 йилдан сўнг озод қилинди, қариндошлари ва дўстлари уни қўллаб-қувватлади. Кенан қамоқхонада ўзини яхши тутгани учун муддатидан аввал чиқиб кетишга муваффақ бўлди. Бундай саргузаштлардан кейин у бошқа ноқонуний иш ҳақида ўйламагани аниқ. Актёр Испанияда, Барселонада яшаб, ресторан бизнеси билан шуғуллана бошлади. Аммо у ватанини ҳам унутмади: узоқ йиллик таътилдан сўнг, 1999 йилда Туркияга қайтди. Ва ўз касбини давом эттиришга муваффақ бўлди. Кенан бир нечта телесериалларда рол ҳам ўйнади, турмуш қурди, ўғил кўрди. Ҳозир актёр икки давлатда истиқомат қилиб, Испаниядаги ресторанларини бошқаришда давом этмоқда ва умуман у тақдири шундай кечганидан мамнун.
Мине Чайрўғлу — Муниса қўшиқчи ва актриса
Томошабинлар Мине Чайрўғлини ҳам яхши эслайди: актриса бош қаҳрамон Фериде томонидан асраб олинган қишлоқ қизи Муниса ролини ижро этган. 1986 йилги сериалда Мине 9 ёшли қизалоқ ролини ўйнаган ва бу унинг биринчи ижроси эмасди. Сўнгги 30 йил ичида Мине жуда кўп ютуқларга эришди: 43 ёшли гўзал ва истеъдодли актриса йигирмага яқин фильм ва телекўрсатувларда рол ўйнаган ва у куйлаш борасида ҳам муваффақиятга эришган.
Садри Алишик – Хайруллобей
Актёр Садри Алишик телесериалида 60 ёшида иштирок этган ва унинг фильмографиясида 140 тадан кўпроқ рол мавжуд. У 1946 йилда, 25 ёшида актёрлик фаолиятини бошлаган ва ҳақиқий келишган одам, аристократик хусусиятларга эга қорамағиз актёр эди. Садри Алишик Туркияда машҳурликка эришди: у ҳам драматик, ҳам комедия ролларини бир хил даражада яхши ижро этган. Айниқса, «Чолиқуши» фильмида ўз истеъдодини ажойиб тарзда намоён қилган. 80 йилларда у олдингига қараганда камроқ суратга туша бошлаган эди. 1995 йилда таниқли актёр вафот этди. Садри Алишик ўлимидан бир йил аввал сўнгги ролини ижро этганди. У нафақат «Чолиқуши» сериали ва бошқа кўплаб киноасарларнинг севимли ижодкори, балки шоир сифатида ҳам ёдда қолди: унинг муаллифлигида шеърлари чоп этилди. Актёр шарафига Туркияда маданият маркази ва театрлардан бирига ном берилган.
Мазмунли сериал қаҳрамонларини севиб қолган томошабинлар энди нафақат эски эпизодларни қайта томоша қилишлари, балки 2013 йилда худди шу ном остида суратга олинган «Чолиқуши» янги лойиҳаси билан солиштиришлари мумкин.
