ДХХнинг Наманган ва Андижон вилоятлари бўйича бошқармалари ходимлари томонидан ўтказилган тезкор тадбирида катта миқдордаги чет эл валютасини ноқонуний равишда хорижга чиқариш билан шуғулланган жиноий гуруҳ фаолиятига чек қўйилди. Бу ҳақда «Ўзбекистон 24» телеканали орқали эфирга узатилган лавҳада маълум қилинди.

Маълум қилинишича, Андижон вилояти Қўрғонтепа туманининг чегараолди ҳудудида яшовчи 32 ёшли маҳаллий фуқаро бошқарувидаги Damas автомобили тўхтатилиб, текширилганда, унинг салони қисмида 968,9 минг доллар борлиги маълум бўлган ва процессуал тартибда расмийлаштириб олинган.

Шунингдек, ушбу тумандаги ёғоч бозорида уни кутиб турган 58 ёшли, муқаддам судланган жиноий шериги ҳам ушланиб, унинг Damas’да бўлган 672,2 минг доллар миқдоридаги пул ҳам тегишли тартибда расмийлаштириб олинган.

Бундан ташқари, Ўзбекистонда вақтинча рўйхатдан ўтиб яшаётган ушбу гуруҳ етакчиси қирғизистонлик шахс (1974 йилда туғилган) Тошкент шаҳрида ва гуруҳ аъзолари бўлмиш беш нафар Қирғизистон фуқаролари Андижон шаҳрида қўлга олинган.

Ўтказилган тезкор тадбир давомида 1,641 миллион долларнинг мамлакатдан ноқонуний олиб чиқиб кетилишига чек қўйилган.

Ҳозирда ҳолат юзасидан Жиноят кодексининг 182-моддаси (божхона тўғрисидаги қонунчиликни бузиш) 2-қисми «а» банди билан жиноят иши қўзғатилиб, тергов ҳаракатлари олиб борилмоқда.

Аввалроқ ДХХ Қозоғистонга 1 млн долларга яқин валютани ноқонуний олиб чиқишга уринган поезд машинистларини қўлга олгани тўғрисида хабар берилганди.