COVID-19’ни тезкор аниқлаш тестини яратган америкалик иммунолог вафот этди - 8 Февраля 2021

Коронавирус учун дунёдаги энг биринчи тезкор тестлардан бирини яратган иммунолог Эндрю Брук вафот этди. Унинг ихтироси тегишли идоралар, шу жумладан, АҚШ озиқ-овқат ва фармацевтика идораси (FDA) томонидан тасдиқланган эди, деб ёзмоқда «Комсомольская правда».

Нью-Жерсидаги Рутгерс университетида ишлаган Брук 51 ёшда бўлган. У ишлаб чиқарган коронавирус тести беморнинг бурун бўшлиғидан суюқлик намунаси олиш орқали қўлланилади. Бу нафақат касалликни аниқлаш тезлигини сезиларли даражада оширган, балки тиббиёт ходимларининг биоматериалларни йиғишдаги иштирокини минималлаштирган.

Университет веб-сайтида иммунолог ҳақида шундай ахборот берилган:

«COVID-19’ни сўлак орқали аниқлайдиган биринчи тестни ишлаб чиқишга раҳбарлик қилган ва пандемияга қарши курашда муҳим рол ўйнаган тадқиқотчи Эндрю Брук кутилмаганда вафот этди».

Марҳумнинг синглиси олимнинг тўсатдан вафот этишига юрак хуружи сабаб бўлганини айтган. Нью-Жерси губернатори Фил Мёрфи тадқиқотчини «мадҳ этилмаган қаҳрамон» деб атади.

Маълумот учун, 2020 йил февраль ойининг бошида Ухандаги касалхонада коронавирус хавфи ҳақида биринчилардан бўлиб огоҳлантирган шифокор Ли Венлян коронавирус асоратлари оқибатида вафот этган. Кейинчалик апрель ойида Буюк Британия бош вазири Борис Жонсонни коронавирус хавфидан огоҳлантирган шифокор коронавирус асоратлари туфайли ҳаётдан кўз юмган.