 Уйланаётган йигитларга бахт-саодат ёки хотинни севиш кераклиги ҳақидаги хаёлий гаплар эмас, айни бир ҳақиқат айтилишини сиз — аёллар ҳамиша ҳам билавермайсиз. «Энди пул топишинг керак» дейилади уларга. «Нима бўпти? Эркак бўлгандан кейин топади-да», дейсизми? Худди шу гапни айтишингизни билгани учун ҳам уйланган акаларию бошқа таниш эркаклар олдиндан маслаҳат бериб қўядилар. Албатта, турли шаклларда айтилади: «Бўйнингга ола хуржун тушади», «оилангни боқишинг керак», «пул топмайдиган эрнинг хотинга нима кераги бор?», «пул топмасанг, тамомсан…»
Тарихга назар
Оқибатда уйланишни — хотин аталмиш тўймас хазиначига умрбод пул топшириш деб тушуна бошлайди шўрлик куёв. Шундай деб тушунмасдан ҳам иложи йўқ. Эртага барибир бошига тушади: «Пул топинг, пул… пул… пул…» Эр дастлаб индамайди, кейин ҳайрон бўлади, ахийри бу сўздан ўткир аллергик касаллик орттириб олади.
Ўйлаб қоласан, нега аксарият хотинлар эридан асосан пул топишни талаб қилади. Масалан, эри мактаб чоғларида расм чизган ёки синфдошлари билан фаоллар залида «Андижон полкаси»га рақс тушган, жуда бўлмаса, футбол ўйнашга қизиққан. Йиллар ўтиб, хотини: «Вой, дадаси, ҳадеб пул топишга вақт сарфламанг, рассомлик иқтидорингиз бутунлай сўниб қолмаслиги учун якшанба кунлари расм чизиб туринг», демайди. «Раққослар тўгарагига қатнанг», деб эса ўлса ҳам айтмаса керак. Футбол-ку улар учун бекорчиликдан бошқа нарса эмас.
«Нега улар учун пул биринчи ўринда туради?» деган саволга тарихдан жавоб топиш мумкин. Хотинлар бу борада тарих илмини, аниқроғи, «яқин тарих»ни сув қилиб ичиб олишган. «Тарих»дан маълумки, кимнинг эри пул топмаса, оила камбағаллашади, янги кийимлару тақинчоқлар ололмайди, бундай оиланинг уй-жойи ҳам нобоп, машинаси йўқ, болалари нуфузли ўқишларда ўқишолмайди, обрўли жойлардан совчилар келмайди, қачон бир маърака қилмоқчи бўлса, қўни-қўшнию қариндошлардан қарз сўраб юради, энг ёмони, жуда кўп харажат талаб қилинадиган, даволаниши йилларга чўзиладиган касалликка учраса, ўлиб кетиши эр томонидан гўёки «кафолатланади».
«Шунинг учун «пул топ» деймиз, — изоҳ беради бир хотин. — Ахир, эркак оиланинг бошлиғи, боқиш унинг зиммасида. Ишсиз юришга, чўзилиб ётишга, қуруқ маошга ишлашга нима ҳаққи бор?! Пул тополмас экан, бировнинг қизини бахтсиз қилиб, нега уйланади?..» [ www.BePuL.NeT -Saytdan olindi.]
Аслида қандай?
Аслида булар бир баҳона. «Пул топинг», «пул керак» деган жумлалар қар қандай хотиннинг «ташриф қоғози»дир. Хотиннинг устидан бемалол тажриба ўтказиб, бу гапларни амалда текшириб кўрса бўлади. Мисол учун, ичиб-чекадиган, ойликка яшайдиган эр кутилмаганда сигаретадан воз кечади, ароқнинг яқинига ҳам йўлмай қўяди. Қўшимча даромад деганларидек, ойликни кутиб ўтирмасдан бошқа ишлардан ҳам пул ишлай бошлайди. Аввалги эркак билан кейингиси осмон ва ерча фарқ қилади, аммо хотин ўша-ўша, ўзгармасдан қолади. Яна эски пластинка:
— Бугун пул олиб келмадингизми? Эртага «продукта»га бормоқчи эдим… Якшанба куни кийим олишим керак, кейинги ҳафта онамни кўришга бораман…
Эр «эски ҳаммом, эски тос» ҳолида юравериши мумкин эди-ку. Эшитган раҳмати шуми, ахир? Балки бу шукр қилишни билмасликдир?..
Пул топишни эр ўйламайди, дейсизми? Ўйлайди, жуда кўп ўйлайди, ҳаракат қилади, аммо «пул, пул» деяверган хотин шу қадар бездириб қўядики, «топсам ҳам, топмасам ҳам пул дейди» деб эрнинг ҳафсаласи пир бўлади, шижоати сўнади. Ҳеч бўлмаса, ичида сизни қўланса сўзлар билан боплаб сўкади! Руҳшуносларнинг тадқиқотига кўра, «пул, пул» дейдиган хотинларнинг эрлари ичида сўкиниш касаллигига нисбатан кўпроқ дучор бўлишаркан.
Оила бир мамлакат бўлса, рўзғор унинг иқтисодиёти. Рўзғори ночор бўлиб қолишдан қўрқадиган, пулга ҳирс қўйган ёки бадавлат эрга теголмаганидан ўкинадиган аёллардан «пул топинг… топинг… топинг…» дейдиганлар етишиб чиқади. Улар эр деганда боқувчинигина тушунади, холос. Оқибатда эр оилада фақат пул топадиган ишчи-чумоли сифатидагина ўрин эгаллайди. Суюмли эр, меҳрибон ва сирдош ота, ажойиб инсон каби хислатлари эса йўқолиб кетганини эса хотиннинг ўзи ҳам сезмай қолади. [ www.BePuL.NeT -Saytdan olindi.]
Нима қилиш керак?
«Нима қилиш керак?» деган савол ҳамиша «Кимга қарши нима қилишим керак?» маъносида тушунилади. Шундай экан, хотин «пул, пул» деяверса, эр ўз хотин билан гапни бир жойга қўйиб, ўзаро келишиб олишлари лозим. Қачон маош берилади, қайси иш бажарилса, қанча даромад қилинади, бунинг учун хотин ҳам қараб ўтирмасдан нималар қилиши лозим ва ҳоказо. Хотин фақат пул топишни талаб қиладиган оилаларда ҳисоб-китоб жойида эмаслиги ҳам бежиз эмас-да, ахир.
Ҳурматли эркаклар, хотинингиз шундан кейин ҳам пулни биринчи ўринга қўйса, сиз ҳам уни фақат пул қабул қилиб оладиган кассир деб тушунинг, тамом-вассалом. Кўп ўтмай ўзига келиб қолмаса, мана, мен кафил. Нима дейсиз, кассир аёлларга меҳр, эркалаш, севги керакмасми? Шунақа керакки…
Manba: www.SheJoT.CoM - Saytdan olindi!
|
