 Sotheby’s auksionining Gongkongda bo‘lib o‘tgan savdolari chog‘ida Min sulolasi davriga oid chinni "tovuq-piyola” 281,2 million Gongkong dollari (36,3 million AQSh dollari)ga sotildi. Bu haqda The Wall Street Journal xabar bermoqda. "Kun” nashrining xabar berishicha, 8-aprel, seshanba kuni bo‘lib o‘tgan auksiondagi bu savdo obyekti tarixda eng yuqori narxga sotilgan Xitoy chinnisiga aylangan.
Bu boradagi avvalgi rekord ham Gongkongdagi auksionda o‘rnatilgan bo‘lib, 2010-yili atirgulli chinni xitoy vazasi 252,7 million Gongkong dollariga sotilgan edi.
Piyolani shanxaylik kolleksioner Liu Yichian sotib olgan. "Men nega bu piyolani bunday katta narxga sotib oldim? Chunki bu piyola menga yoqadi”, — deydi Liu.
Qayd etish joiz, ushbu piyola 1999-yili Gongkong auksioni orqali 29 million Gongkong dollariga sotilgan bo‘lib, bu o‘sha vaqtlar uchun eng rekord narxga aylangan edi.
Piyolani 1999-yili sotib olgan Juzeppe Ashkenazining o‘zi seshanba kungi auksionlarda "tovuq-piyola” 200 million Gongkong dollari atrofida sotilishiga umid qilganini bildirdi.
Chenghua davriga oid chinnilar o‘zining favqulodda nafis ishlangani bilan ajralib turadi. Rekord narxga sotilgan piyola unga tovuq va xo‘rozlarning suratlari tushirilgani uchun "tovuq-piyola” deb ataladi.
Hozirgi vaqtda shunday piyolalarning jahon bo‘ylab faqat 19 tasi saqlanib qolgani ma’lum bo‘lib, ularning 15 tasi muzeylardan joy olgan.
Manba: www.SheJoT.CoM - Saytdan olindi!
| 
