 Janubiy Koreya qirg‘oqlari yaqinida "Sevol” paromining halokatga uchrashi natijasida halok bo‘lganlar soni 150 nafarga yetdi. The Korea Herald xabariga ko‘ra, cho‘kkan kemaning yana shuncha yo‘lovchisi bedarak yo‘qolgan deb gumon qilinmoqda. Yonhap axborot agentligi xabariga ko‘ra, taxminan 550 kishi, 212 ta kema va 34 ta havo kemasi jalb etilgan qutqaruv operatsiyasini kuchli oqim murakkablashtirmoqda.
"Sevol” paromi 16-aprel tongida halokatga uchragan edi. Uning bortida 476 yo‘lovchi, asosan Cheju oroliga sayohatga ketayotgan maktab o‘quvchilari bo‘lgan.
174 kishi, jumladan, kema kapitani va ekipajining ko‘plab a’zolari qutqarib qolingan. Kema kapitani, 68 yoshli Li Chjun Sok ayni vaqtda tergov qilinmoqda. U o‘zini yo‘lovchi sifatida ko‘rsatib, kemani birinchilardan bo‘lib tark etgani uchun nizomni buzganlikda ayblanmoqda.
Bundan tashqari, omon qolganlarning so‘zlariga ko‘ra, kema cho‘kishni boshlagan vaqtda ekipaj odamlarni evakuatsiya qilish uchun hech qanday choralar ko‘rmay, hammani xotirjamlikka chaqirgan va yo‘lovchilardan o‘z joylarida qolishni so‘ragan, deb yozadi "Kun”.
Reuters xabariga ko‘ra, birinchi halokat signali kema ekipajidan emas, balki qo‘rqib ketgan boladan kelgan. Shundan so‘ng cho‘kayotgan kemadagi bolalardan yana 20 ta shoshilinch chaqiruv kelib tushgan.
Manba: www.SheJoT.CoM - Saytdan olindi!
| 
