Бугун бутун дунёда пластик жарроҳлик шу қадар тез суръатларда ривожланиб бораётганига ўз қиёфасини, ташқи кўринишини буткул ўзгартираётган инсонлар мисолида такрор ва такрор амин бўляпмиз.
Ана шундайлардан бири Ванилла Чаму жарроҳлар ёрдамида япон қизидан француз гўзалига айланди қолди. Ўз тасаввуридаги соҳибжамолга айланиш учун Ванилла бир эмас, икки эмас, нақ ўттиз маротаба пластик жарроҳлик жараёнларига чидаб берди.
Зотан, гўзаллик қурбонликни талаб этади, деб бежиз айтишмайди. Хабарларга қараганда, янги француз гўзали ғарбликлар қиёфасини ўзлаштириш учун 100 минг АҚШ долларидан зиёд миқдорда маблағ сарфлаган.
Маълум бўлишича, Чаму хоним илк жарроҳлик столига 19 ёшида ётган. Шундан буён сунъий гўзаллик усуллари натижасида унинг кўриниши таниб бўлмас даражада ўзгарган.
Ўз ёшини сир тутаётган соҳибжамол бугунги кунда моделлик билан шуғулланади. Чамунинг айтишича, у орзуидаги «француз гўзали»га айланиш учун қанча лозим бўлса, шунча операция қилдиришга тайёр.
Дарҳақиқат, гўзалликнинг ортиқчаси бўлмайди, аммо Яратган инъом этган шундоқ ҳам гўзал чеҳрамизга шукр қилиб яшашга нима етсин!
