 Табриклаймиз, сиз она бўлдингиз! Турли сабабларга кўра фарзандингиз кесарча кесиш усули орқали дунёга келди. Демак, дастлабки кунларда қорин соҳасида оғриқ туришига тайёр туринг. Ташвишланманг, тўғри ҳаракат қилиш орқали оғриқларни енгиллаштиришга эришиш мумкин.
Мутахассисимиз — олий тоифали шифокор, гинеколог Нилуфар АБДУЛЛАЕВА.
Чокларга зиён етмасин
Жарроҳликдан сўнг бир муддат қорнингиз борлигини сезмаслигингиз мумкин. Бу ҳали наркоз таъсирида эканлигингиздан далолат бериб турса-да, кўп муддат давом этмайди. Кейин тикилган чоклар ўрнида оғриқ туради. Ёнбошга оғриқсиз ўгрилиш учун тиззаларни бироз тепага кўтариб, оёқ кафти билан кароватга тиралинг. Бунда елка ва сон бир хил баландликда бўлишига эътибор беринг. Сўнг эҳтиёткорлик билан сонингизни ўнг томонингизга силжитинг. Кейин танагизнинг юқори қисмини ҳам худди шу томонга ҳаракатлантиринг. Ёнбошлашнинг бундай усули чокларга зиён етказмайди.
Йўталиш шарт!
Умумий наркоздан кейин одатда ўпкада суюқлик тўпланиб қолади ва баъзи ҳолларда у инфекция тушишига сабаб бўлади. Шу сабабли суюқлик организмдан чиқиб кетиши учун тез-тез йўталишга тўғри келади.
Юмшоқ сочиқ ёки кичик ёстиқчани чок устига босиб, ўпкани тўлдириб нафас олинг, сўнг тез нафас чиқаринг. Бироқ бунда қоринни шишириш эмас, эҳтиёткорлик билан ичга тортиш лозим. Нафас чиқараётганда «вов» сўзини талаффуз қилинг. Қорин қулдураши ёки хиқичоқ тутганда соатига бир неча бор такрорлаш тавсия этилади.
Ичаклардаги газ муаммоси
Кесарча кесиш амалиётидан кейин қорин соҳасида газ ҳосил бўлиши чинакам муаммога айланиши мумкин. Газ тўплангач, то ундан халос бўлмагунингизча оғриқ безовта қилаверади. Бунинг сабаби эса ичаклар фаоллигининг сустлашганидир. Бундай вазиятда қорин соҳасини ичаклар йўналиши бўйлаб енгил уқалаш ҳам яхши самара беради.
Эмизиш-чи?
Маълумки, жарроҳликдан кейин 3-4 килограмдан оғир юк кўтаришга рухсат этилмайди. Чақалоқ ва ўзингиз учун қулай ҳолатни топиш муаммо туғдиради. Чунки уни олдингизга олиб эмизсангиз, чоклар бўшаб кетиш эҳтимоли мавжуд. Бунда болани ёнбошингизга ёстиқ қўйиб ётқизишингиз ёки қорин устига кичик ёстиқча қўйиш орқали муаммони ҳал этишингиз мумкин.
Жинсий ҳаётга қайтиш...
Туғруқдан кейин аёл бачадони катта ярали юзага ўхшаб қолади, маълумки, ҳар қандай яра инфекция чақирувчидир. Ушбу яранинг битиш жараёни ажралмалар (лохий) чиқиши билан кечади. 6-8 ҳафтадан сўнг, яъни ажралмалар тўхтагач, бачадон шиллиқ қавати тикланган ҳисобланади ва жинсий ҳаётга қайтишга имкон туғилади.
Қачон иплар ечилади?
7 кун давомида ҳамшира чокни антисептик воситалар билан парваришлайди. Сўнгра ип олиб ташланади. Шундан кейингина чўмилишга рухсат берилади, албатта, ярани ишқаламаслик шарти билан.
САОДАТ тайёрлади.
Manba: www.SheJoT.CoM - Saytdan olindi!
| 
