Хонанда Бритни Спирс ўз хотираларида ота-онаси қарамоғида ўтказган йиллар ҳақида ҳикоя қилади. Хонанда аллақачон Simon & Schuster билан 15 миллион долларлик шартнома имзолаган.

Лекин Спирс ҳам, унинг вакиллари ҳам, нашриёт ҳам ҳозирча батафсил маълумот бергани йўқ, аммо китоб Бритни оиласига бағишланиши маълум. 2021 йил охирида хонанда бир неча бор ижтимоий тармоқлар орқали оиласига мурожаат қилиб, адолат талаб қилган эди.

Жейми Спирс 2021 йил сентябрь ойида қизининг васийлигидан воз кечганига қарамай, улар мунтазам равишда судда учрашишда давом этмоқда. Поп маликасининг отаси ундан қонуний ва бизнес харажатларини тўлашда давом этишини талаб қилди. Бритнининг даъво қилишича, у отасининг васийлигида бўлган барча йиллар давомида (деярли 13 йил), отаси молиявий ҳуқуқбузарликларни содир этиб, унинг пулларини ёлғиз ўзи тасарруф қилган, шунинг учун у ҳар қандай тўловларни қатъиян рад этади. Суднинг кейинги йиғилиши 2022 йил июль ойига режалаштирилган, шунинг учун ҳам бу иш узоқ вақт давомида ёпилмайди.

Эслатиб ўтамиз, Бритни Спирс  2008 йилдан бери, биринчи марта асабий тушкунликдан кейин психиатрия клиникасига жойлаштирилган ва 13 йил давомида отасининг қарамоғида бўлган. Эстрада маликаси ҳаётининг барча жабҳалари — молиядан тортиб шахсий ҳаётигача Жеймининг назорати остида эди. Бундан ташқари, у қизининг иши билан шуғуллангани учун ойига 16 минг доллар нафақа ҳам олган. Бритни 2021 йил сентябрида озод бўлди ва шундан сўнг фаол ҳаётга қайтди: у қайлиғи Сем Асгари билан никоҳ тўйини, фильмлар суратга олишни ва янги альбом ёзишни режалаштирмоқда.