Россия президенти Владимир Путиннинг матбуот котиби Дмитрий Песков Россия етакчисининг коронавирусдан ҳимояланган махсус бункерда яшаётгани ҳақидаги миш-мишларни рад этди. Унинг таъкидлашича, Путин ҳозирда пандемиягача каби Ново-Огарёводаги қароргоҳида яшамоқда ва баъзида Кремлдаги иш жойига ҳамда сафарларга чиқиб турибди.
Таъкидланишича, охирги вақтда маҳаллий ва хорижий ОАВда Путин пандемия вақтида коронавирусдан ҳимояланган махсус бункерда яшаётгани ҳақида маълумотлар тарқалган. Ҳаттоки баъзи журналистлар Путин ўрнига тадбирларда унинг қиёфадоши иштирок этаётгани ҳақида гапиришмоқда.
Бироқ Песков бу миш-мишларни рад этди ва Путин эпидемия бошидан бери ўз қароргоҳида яшаётгани, бироқ зарурат юзага келганда Кремлга келаётгани ва ҳаттоки мамлакат бўйлаб сафарлар уюштираётганини маълум қилди.
Путиннинг матбуот котиби бу ҳақда Наил Аскер-заденинг "Россия 1” каналидаги "Хавфли вирус. Биринчи йил” (Опасный вирус. Первый год) филми учун интервьюда маълум қилди.
"Йўқ, Путин ҳозир пандемиягача яшаган жойи – Ново-Огарёвада яшамоқда. Путин у ерда яшамоқда, ишламоқда, у ердан Кремлга қатнамоқда, ўзи истагандек кўп бўлмаса-да, гоҳида сафарлар уюштирмоқда”, деб маълум қилган Песков бошловчининг президент бункерда яшаётгани ва у ердан кўрсатмалар бераётгани ҳақидаги саволига жавобан.
Песковнинг таъкидлашича, Путин давлат раҳбари хавфсизлигини таъминлаш учун керак бўлганча коронавирусга тест топширмоқда, унинг ихтиёрида шифокорлар, эпидемиологлар бор бўлиб, улар тиббий нуқтаи назардан президентнинг тадбирлар жадвалини тузиб беришади.
Бундан ташқари, Путин ўта зарур ҳолатларда одамлар билан ижтимоий масофани сақлаган ҳолда юзма-юз мулоқот қилмоқда, бироқ бу одамлар Россия президенти билан учрашувдан олдин тестдан ўтишлари керак бўлади.
Песковнинг таъкидлашича, Путиннинг иш тартибини масофавий шаклга ўтказиш қарори эпидемиологлар талабини ҳисобга олган ҳолда қабул қилинган.
Россия президенти ҳозирда ўз қўл остидагилар билан асосан видеоалоқа ва телефон орқали мулоқот қилмоқда. Песковнинг таъкидлашича, унинг ўзи ҳам анчадан бери президентни шахсан кўрмаган ва у билан барча масалалар масофадан ҳал қилинмоқда.
Россия президентининг матбуот котиби пандемиядан кейин ҳам Путин ўтказадиган йиғилишларнинг бир қисмини вақтни тежаш мақсадида видеоанжуман шаклига ўтказиш мумкинлигини айтган. "Фикримча, бунинг барчаси якунланганда, йиғилишларнинг муайян бир қисмини йўлга, одамларни йиғишга, бир жойдан иккинчи жойга ҳаракатланишга вақтни кетказмасдан, видео-конферен-алоқа орқали ўтказиш мумкин”, деб айтган Песков.
Аввалроқ Россияда коронавирусга қарши эмлаш бошлангани, эмлаш бепуллиги ва ихтиёрий тарзда ўтказилиши маълум қилинганди. Ҳозирча ўқитувчилар, тиббий ва ижтимоий хизматлар ходимлари эмланиши мумкин.
