Таниқли журналист, кинотанқидчи Лола Зуннунова кино олами вакилларининг ўз ишига муносабати ҳақида гапирди.
Актёрлар орасида, айниқса ёши улуғ санъаткорларни интервьюга айтилган вақтдан ҳам олдинроқ етиб келишини, аммо ёш актёрлар бу ҳолатнинг мутлақо тескариси эканини, бунинг натижасида фаолияти давомида қизиқ ҳолатлар бўлганини эслади.
Лола Зуннунова интервьюга кеч қолган Улуғбек Қодиров ҳамда Фаррух Соиповларни қандай жазолагани ҳақида YouTube’даги YashinTV каналига берган интервьюсида сўзлаб берди.
Улуғбек Қодиров жуда машҳур бўлган пайтлар эди, қизлар Улуғбек Қодировни кўрса, Майкл Жексонни кўргандек ўзини «тап-тап» ташлайдиган давр эди. Менинг Улуғбекдан биринчи интервью олишим эмас эди. Қолаверса, Улуғбек Қодиров билан курсдош бўлганмиз. Биз учун Улуғбек Қодиров олдингидек курсдош йигит эди. Бир куни Улуғбекни кўрсатув съёмкасига таклиф этдик. Актёрлар кеч уйқудан туришини ҳисобга олиб, соат 11:00 га суратга олиш жараёнини белгиладик.
Лекин соат 11:00 дан уч соат ўтиб, 14:00 да Улуғбек режиссёримизга телефон қилиб, «бугун бора олмайман, кўзларим шишган», деб айтди. Режиссёримиз «Улуғбекнинг интервьюсини эртага суратга оламиз», деди. Менинг жуда жаҳлим чиқди, эртаси куни режалаштирилган ишларим ҳам бор эди. Лекин рози бўлдим, эртаси куни яна съёмкага келдим. Улуғбек Қодиров ҳам келди, камералар тайёр. Саломлашдик, ҳеч қандай эътирозимни билдирганим ҳам йўқ. Камера ёқилганидан кейин «сиз кимсиз» дедим. «Нимангизга ишонасиз» деб айтдим. Улуғбек эса ҳайрон қолди. «Нима учун биз бутун жамоамиз билан кеча сизни кутдик ва бугун яна вақт ажратиб сизни кутдик», дедим. «Агар сиз мени мухлисим, менга маҳлиё бир журналист, деб ўйлаётган бўлсангиз адашасиз», деб айтдим. «Ҳеч ҳам унақа эмас, сизга курсдошимдек қарайман, жуда ҳам нотўғри иш бўлди». «Интервьюмиз тамом», деб айтдим. Оператор ва режиссёримиз ғалати бўлиб қолишди.
«Лола, унақа қилманг, суратга олишимиз керак, продюсер илтимос қилган, режада бор, лавҳа Улуғбек Қодиров билан чиқса чиройли бўлади», дейишди. Мен эса «йўқ дедим» ва интервью бўлмади. Кейин озгина тортишув бўлди, «бўлмаса мен кўрсатувдан кетаман», дедим. Қачонки актёр ва ижодкорлар журналистларни ҳурмат қилса, ўшанда бизни ҳурматимиз, айтаётган сўзларимизнинг салмоғи бўлади. Бугун кечикса, эртага келмаса, индинга, умуман, қолдирса бу қандай бўлади? Бу менинг қайсарлигим, инжиқлигим ёки кибрим эмас, бу бир дарс дедим.
Шу воқеадан кейин Улуғбек Қодиров билан тортишиб қолмаганмиз. У ҳам барибир тўғри тушунган, муносабатлар бузилмаган. Одам бунақа вазиятлар сабаб кўришмай, гаплашмай кетиши мумкин. Лекин кино соҳасида бўлганидан кейин кўп кўришганмиз, гаплашганмиз. Ҳурматимиз ҳозирги кунгача жуда чиройли бўлган.
Худди шунақа ҳолат Фаррух Соипов билан ҳам бўлган. Фаррух Соиповни интервьюга таклиф этганимизда у кечикиб келган, кейин мен ҳам Фаррухни куттирганман. Фаррух келганида мен бошқа ижодкор билан интервьюни бошлаган эдим. Фаррух «мен шошиб турибман», деганида унда «бориб ишларингизни битириб келинг», деганман. Операторимиз ва режиссёримиз «ўзи Фаррухни зўрға, минг бир тавалло билан чақирдик, нимага унақа қиласиз» дейишган. Мен эса «кўрасизлар у келади, агар ўзини ҳурмат қилган инсон бўлса, албатта, қайтиб келади», деб айтганман. Ҳақиқатан Фаррух Соипов ишларини бажариб бироздан сўнг қайтиб келди ва биз интервью олдик. Ҳаммаси жуда чиройли бўлди.
Лекин ҳамма ҳам Улуғбек ва Фаррухдек қабул қилмаслиги мумкин. Масалан, баъзилар «керак бўлса кутасан, бу сенга керак, менга эмас», дейиши ҳам мумкин. Аммо Улуғбек Қодиров ва Фаррух Соипов савияси баланд, тарбияли ва дунёқараши кенг йигитлар экан. Буни тўғри қабул қилишган. Ваҳоланки, улар ўзларининг энг машҳурлик нуқтасига етган, менга ўхшаган журналист қизлар уларнинг қадамига нигорон бўлиб турган вақтлар эди. Мен уларга вазиятни тўғри баҳолагани учун миннатдорлик билдираман.
Лола Зуннунова, журналист, кинотанқидчи
Маълумот учун, Лола Зуннунова 1984 йил 29 июнда Термиз шаҳрида дунёга келган. Журналист «Ёшлар» телеканалида эфирга узатилган «Киномания» кўрсатуви орқали машҳурликка эришган. Лола Зуннунова 2007 йилда M&TVA Award тақдимотининг «Йилнинг энг яхши телебошловчиси» номинацияси ғолиби. 2019 йилда эса «Энг улуғ, энг азиз» республика танловида ғолиб бўлган.
Лола Зуннунова 2019—2021 йилларда Milliy TV телеканалларида фаолият олиб борган. 2019 йилнинг январь ойидан бошлаб Milliy TV каналида бош муҳаррир лавозимида, 2020 йилнинг август ойида эса каналнинг бош директори лавозимида фаолият юритди.
