Malayziya hukumati yo‘qolgan Boeing 777-200ER layneri va Kuala-Lumpurdagi dispetcher vishkasi (minorasi) o‘rtasidagi aloqa matnini ommaga e’lon qildi. Bu haqda BuzzFeed nashri xabar berdi.
Hukumat ushbu rasshifrovkada hech qanday g‘ayrioddiylik yo‘qligini qayd etdi. U orqali olingan muhim ma’lumot yo‘qolgan samolyotdan uzatilgan so‘nggi so‘zlar bo‘ldi. Uchuvchilar va dispetcherlar orasidagi so‘nggi suhbat uchuvchilardan birining “Hammasi yaxshi, xayrli tun” degan gapi bilan tugaganligi haqida xabar berilgan edi. Biroq matn so‘nggi jumlaning “Xayrli tun Malayziya 370” bo‘lganini ko‘rsatgan (Flight 370 — parvoz raqami).
Transport vazirligi so‘nggi so‘zlar aynan kimga tegishli bo‘lganini aniqlash ustida ish olib bormoqda.
Hind okeanining samolyot qulagan deb taxmin qilinayotgan hududida qidiruv ishlari olib borilmoqda. Kecha Avstraliya, Xitoy, Yaponiya, Koreya, Malayziya, Yangi Zelandiya va AQShning to‘qqizta kemasi qidiruv guruhiga kelib qo‘shildi.
Yo‘qolgan “Boing”ning qulagan hududi uning dispetcher bilan so‘nggi aloqasi vaqtidagi sun’iy yo‘ldosh ko‘rsatkichlariga asoslangan. Hudud 46 332 mil kvadratni qamrab oladi.
Qidiruv jamoasi qora qutidagi ma’lumot yozgich qurilmadan keladigan ultra tovushni tutuvchi moslamadan foydalanmoqda. Bunday signallar 30 kungacha davom etishi mumkin.
Kuala-Lumpur–Pekin reysini amalga oshirayotgan Boeing 777-200 samolyoti 8-martga o‘tar kechasi Janubiy Xitoy dengizi ustidan uchib o‘tayotgan vaqtda radarlardan yo‘qolib qolgan. Kema bortida 239 kishi bo‘lgan.
