Хонанда Мавлуда Асалхўжаева MY5 телеканалининг «Омон-Омон» кўрсатувига берган интервьюсида мактабда ўқитувчи бўлиб ишлагани, отаси театр институтига киришини истамаганда алдаб театр институтига киргани ва шундан кейин отаси онаси билан уч ой гаплашмай қўйгани, Туркманистоннинг машҳур рок гуруҳи билан ишлагани ҳақида гапириб берди.

Хонанда мактабда ўқитувчи бўлиб ишлагани ҳақида

«Ёшлигимдан қўшиқ айтишни яхши кўрардим. Отам ҳам санъаткор бўлган. Кичкиналигимда мактабларда қўшиқ айтиб юрардим. Кейинроқ эса театр институтида ўқимоқчи бўлганман, бироқ отам бунга рухсат бермаган. Отам педагогика коллежида мусиқадан дарс берарди, 8-синфни битирганимдан кейин мени ҳам шу ерда ўқитган. Педагогика коллежида 4 йил ўқиганимдан кейин мактабда ишлаганман. Мактаб пайтида озғин, кичкина қиз бўлганман. Ўқитувчи бўлиб ишга кирганимда ҳамма 10-синфга янги ўқувчи келган деб ўйлаган. Ўша пайтлар жуда қизиқарли бўлган. Ўз шаҳрим Жалолободда дарс берганман, болаларни ҳам бошқача ўқитар эдим. Мактабда ҳаммага бир хил: жигарранг форма бўлар эди, билмадим, менга рухсат беришганди, синфдаги 40 нафар ўқувчимнинг формасини бошқача ранг қилдирганман. Кейин эса кўрганлар уларнинг формасига қараб бу Асалхўжаеванинг ўқувчилари деган. Бир ўқувчим кечга қоладиган бўлса, бор, яна кимдир кечга қолса шу билан бирга кирасан деб дарсга киргизмаганман. Ўқувчиларимни бир-бирига сизлаб гапиришга ўргатгандим»,— дейди Мавлуда Асалхўжаева.

$IMAGE2$

Театр институтига ўқишга топширгани ва буни билган отаси онаси билан 3 ой гаплашмагани ҳақида

«Бир опам бўларди, шу мактабда дарс берган. Менга Тошкентдаги театр институтига топширишим кераклиги ҳақида айтган, отам рухсат бермайди деганман. Кейин мен отамга педагогика институтида ўқимоқчиман деб ёлғон гапирганман. Тошкентга келиб театр институтига топшириб кетганман. Отам эса ‘сени қизинг театр институтига ўқишга кирибди’ деб онам билан 3 ой гаплашмаган», — дейди хонанда.

Мавлуда Асалхўжаева Туркманистоннинг машҳур рок гуруҳи билан ишлагани ҳақида

«Театр институтини битирганимдан кейин ўша пайтда 16 та республиканинг қайси бирига юборилса ўша ерда 2 йил давомида ишлаш керак бўлган. Институтни битирганимдан кейин Гулистонга ва  ‘Муқимий’ театрига ишга олиш ҳақида айтишган. Менга эстрада йўналиши ёқарди, шунинг учун уларга рад жавобини бердим. Юнус Тўраев фелормониясига борганимда ҳам менга бу иш унча маъқул келмаган. Кейин Сочидаги танловга борганимизда ‘Дестан Гунеш’ номли рок гуруҳи ҳаммага ёқадиган, профессионал тароналар айтадиган гуруҳ менга ҳам ёқиб қолган. Мен ҳам уларга ёқиб қолган эканман, институтни битирганимдан кейин келишим ҳақида сўрашди. Вақт ўтиб шу гуруҳ менга хат жўнатди, шундан сўнг Ашхободга борганман. Биринчи борганимда ‘Дестан’ деган ансамблда ишлаганман. Мен у ерда эстрада ва классика йўналишидаги қўшиқларни ижро этганман, уларнинг йўналиши эса умуман бошқача бўлган. Туркман тилини билмасам ҳам қўшиқ куйлашга ҳаракат қилганман. Бундан ташқари гуруҳ мақомни рок йўналишда ижро этарди, мен эса чоргоҳ, алла айтиш билан уларни лол қолдирганман», — дейди хонанда ёшлик хотираларини эслаб.