Ҳашаматли ва мукаммал қиёфа ҳосил қилишнинг аниқ бир қоидаси мавжуд эмас, аслида. Чўнтакларингиз пулга тўла бўлганда ҳам, қимматбаҳо дўконлар мижози бўлган тақдиринингизда ҳам буни ҳашаматли образ яратиш билан ягона нарса деб бўлмайди. Шунга қарамай, бу борада сизга ёрдам бериши мумкин бўлган, ҳамиша мукаммал ва ҳашамдор кўринишингизни таъминлай оладиган айрим усуллар мавжуд.

Фақатгина «янгидек» кўринишга эга бўлган либослар кийинг

Ўз либосларингизга нисбатан беэътибор бўлманг, уларнинг янгидек ҳолатда сақланиши ва сизга имкон қадар кўпроқ хизмат қилиши учун уларни ювиш жараёнида либос ёрлиғидаги барча жиҳатларга диққат қаратинг. Либосни ювиш аввалидан уни тескари томонга ағдаринг ва кир ювиш давомийлигини 35-40 дақиқадан ошириб юборманг. Нозик матоли либосларни кир ювиш машинасида эмас, қўлда ювиш тавсия этилади.  

Тугмаларни алмаштиринг

Либосга ҳашаматли кўриниш беришнинг энг оддий усулларидан бири ундаги барча тугмаларни алмаштириб чиқиш ҳисобланади. Пластмассадан ишланган тугмаларни сифатли ва металлдан ишланган тугмаларга алмаштиринг.

Оқ ранг ҳақида унутманг

Ўзингиз истаган кунларнинг бирида бошдан оёқ оқ рангдаги либослар кийинг. Бу оқ рангли шим, кўйлак, пальто бўлиши ҳам мумкин. Оқ ранг ҳар қачон ҳашаматли кўриниш ҳосил қилиш учун ёрдам бериб келган. Оқ рангли либослардан ташкил топган қишки образлар яна ҳам чиройли ва ҳашаматли кўринади. 

Имкон қадар сокин рангли либослар танланг.

Оч ва сокин ранглар ўзаро уйғунлашгтирилган ҳолатда жозибадор кўриниш ҳосил қилади. Шу сабабли ҳам бир нечта турдаги оч рангларни мослаштириб, янги образ яратишга ҳаракат қилиб кўринг. Оч жигарранг, оч пушти, оқ ранглар  ҳам ҳашаматли қиёфа яратишда жуда қўлкелади. 

Вақтга қарши ишлайдиган гардероб

Тўғри бичимли пальто, сифатли материалдан яратилган тренч, кўк рангли жинси, бир нечта водолазка, «қаламча» бичимидаги юбка... Буларнинг барчаси ҳеч қачон урфдан қолмайдиган топилмалар сирасига киради. Уларга мода оламининг шиддатли тўфонлари таъсир қила олмайди. Мазкур либосларга бир  нечта аксессуар қўшиш орқали эса классик уст-бошларни замонга мослаштириб олишингиз мумкин.

Аксессуарлар сифатли бўлиши керак

Сумка, камар, бош кийимлар ва бошқа аксессуарларни ҳарид қилиш пайтида арзон нархига учманг. Дизайнерлар дид билан танланган аксессуар урфдан қолган либосни ҳам трендга айлантириб бериши мумкин эканлиги ҳақида айтадилар. Яна бир муҳим қоида ёдингизда бўлсин, унчалик ҳам машҳур бўлмаган бренднинг ўртамиёна нархдаги сифатли сумкаси «Шанел»нинг сохлаштирилган аксессуаридан устунроқдир.

«Қайиқча» услубидаги пойабзал

Қанчалар жиддий услубда кийинган бўлманг, оёқларингизни ажойиб пойабзал безаб турмас экан, қилган ҳаракатларингизнинг барчаси бекор. Яна бир гап: «қайиқча» услубидаги туфли - у хоҳ қиммат дўкондан, хоҳ бозордан сотиб олинган бўлсин - ҳар қандай ҳолатда ҳам жуда чиройли ва ҳашаматли кўринади. 

Принтларга беэътибор бўлманг!

Аксарият аёллар ўйлагани каби либос принтлари қиёфага бачканалик бағишламайди. Аксинча, улар ажойиб қиёфа ва услуб ҳосил қилиб бериши мумкин. Вақт синовларидан омадли ўтган принтлар - катак гуллар, йўл-йўл чизиқлар, нуқталар айнан шулар жумласидандир. 

Ўзгаринг!

Замонавий мода оламида имкониятлар тушунчасининг ҳеч қандай чегараси йўқ. Ўзингизни маълум бир услуб билан чегаралаб қўйманг. Гардеробингизда спорт услубидаги либослар, романтик кўринишга эга кўйлаклар, жиддий кийимлар ҳам бўлиши керак.  Коко Шанел таъкидлаганидек: « Бетакрор бўлиш учун аёл киши ҳар куни ўзгариши лозим!». Буни унутманг.