 — Охирги пайтларда ўзимни ўғлимнинг хизматкоридек ҳис қиляпман. У мустақил кийинишга ўргангиси келмаяпти. Наҳотки, бир умр унинг пайпоғини кийдириб, боғичларини боғлаб ўтсам?!
Малика, 28 ёш, Навоий вилояти
Хулоса қилишга шошманг! Сиз йигирма иккига чиқиб ота-онаси кийинтириб қўядиган соғлом болани ҳеч учратганмисиз? Демак, вақти келиб, барибир, ўзи кийинишни бошлайди. Қуйида эса бу масала бўйича ота-оналарга асқотиши мумкин бўлган айрим тавсияларни берамиз.
Қачон ўрганади?
Болани уч ёшдан бошлаб, аста-секин мустақил кийинишга ўргатиш мумкин. Босим ўтказманг, барини сабр билан амалга оширинг. Аввало кичкинтой кийим кийиб-ечиш ҳар куни амалга ошириладиган одатий иш эканини англасин.
Тўғри танлов
Фарзандингизга кийим танлаётганда бичими оддий, кийиб-ечиши учун қулай бўлганларга эътибор қаратинг. Боғичи боғланадиган, тугмалари тақиладиган, мураккаб қадамалари мавжуд кийимларни харид қилманг. Белида юмшоқ резинкали иштонларни ёш бола тугма ва молнияли шимдан осонроқ кийиб-ечишини ўзингиз ҳам биласиз.
Оёқ кийим муаммоси
Ёш болалар кўпинча оёқ кийимларини тескари кийиб оладилар. Ҳозир сотувда ўнг пойабзални чапидан фарқлаш учун пошна ёки тумшуғи турли рангга бўялган болалар оёқ кийимлари бор. Аммо оддий пойабзални ҳам ўзингиз "қулайлаштириш”ингиз мумкин. Масалан, оёқ кийимнинг икки пойига икки хил патак солиб берасиз ё пошнасини турлича рангга бўяб қўясиз. Кейин қайси ранглисини қай оёққа кийишни тушунтирасиз. Бу кичкинтойнинг ўнг ва чап томонларни эрта фарқлашига замин яратди.
Яна фарзандингизга оёқ кийим кийдираётганингизда ҳаракатларингизни тушунтириб, изоҳлаб боринг. Масалан, "Аввал ўнг оёғимизнинг учини ботинкачага тиқамиз, кейин товонимизни киргизиб босамиз, сўнг боғични ёпиштирамиз...” тарзида. Орада "ҳоппа”, "анакаби сўзларни ишлатиб, уни жараёнга қизиқтириб туринг.[ www.BePuL.NeT -Saytdan olindi]
«Ёрдам беринг, ойижон!»
Футболка, водолазка кияётганда кичкинтойнинг боши кийимнинг бўйин ўйиғига тиқилиб қолиши мумкин. Қисқагина фурсатга бўлса-да, кўзлари ёпилиб, қоронғида қолгани болакайга бу ёқмайди, уни қўрқитади. Қўрқувни бартараф этиш учун болага кийимни кийдиришдан аввал бош қисмини иложи борича кенгайтириб очиб кўрсатинг. Токи у кийим бошидан ўтиш учун етарли даражада кенглигини англасин. Кийдираётганда бўйин ўмизига боланинг даҳани эмас, бошининг энг чўққи қисми биринчи бўлиб кирсин. Кийим бошдан кийиб олингандан сўнг қўллар енгларга киритилиши кераклигини ҳам тушунтиринг. Акс ҳолда, кичкинтой ҳам бошини, ҳам қўлларини бараварига суқиб, қийин аҳволда қолиши мумкин.
Бола бир ёки икки уринишда кийимни ўзи кийишни ўрганиб олишига умид қилманг. Аслида, бу жараённи ўзлаштириш кичкинтойга сиз ўйлагандан анча қийинроқ.
Энди-чи, энди?
Болангиз мустақил кийинишни уддалай бошлагач, кичкинтойни эртанги кун об-ҳаво маълумотлари билан таништиринг. Бу телевидение, радио ва ҳатто уяли телефон орқали олинадиган маълумот бўлиши мумкин. Маълумотдаги бола учун тушунарсиз сўз ва ибораларни изоҳлаб беринг (масалан, "ёғингарчилик” сўзи ёмғир ёки қорни англатади).
Кейин у билан бирга эртага кийилиши керак бўлган кийимларни танланг. Аввало, ҳаммасини қандай кийилса, шундай тартибда бирор жойга ёйиб қўйинг. Масалан, қалпоқ тепароққа, кўйлак ўртага, шим пастроққа ва ҳ.к. Уларнинг биринчи қайсинисию энг охири қай бири кийилишини болага тушунтиринг.
Боланинг шкафига кийимларни тахлашда ҳам шу тартибга риоя қилинг. Яъни бош кийимлар энг юқори катакка, устки кийимлар ўртароққа, пайпоқлар эса энг қуйига. Иложи бўлса, шкафнинг бир устунини кичкинтойга ажратиб беринг. У ерга болакайнинг ўзи тинглаган об-ҳаво маълумотига асосан эртанги кийимларини тартиб билан тахлаб чиқсин. Албатта, сизнинг ёрдамингиз билан. Шунда эрталаб боғчага шошаётганингизда уни киймайман, буни кияман деган бошоғриқдан қутуласиз. Бу ўринда асосий қоидани унутманг: ҳаммаси кичкинтойнинг розилиги билан бўлсин. Яна бир огоҳлантириш: бола ухлагач, у танлаган кийимни билдирмай алмаштириб қўйиб, ғирромлик қилманг. У нафақат бу ўйинни қайта ўйнамайди, балки сизга ҳам ишонмай қўяди.
Шаҳноза ТЎРАХЎЖАЕВА
Manba: www.SheJoT.CoM - Saytdan olindi!
| 
