Ижтимоий тармоқларда Самарқанд шаҳрида бир йигит кўчада кетаётган кишини тепгани тасвирланган видео тарқалган эди. Самарқанд вилояти ИИБнинг маълум қилишича, вояга етмаган йигитларнинг шахси аниқланиб, уларнинг ота-оналарига нисбатан тегишли чора кўрилган.
Маълум қилинишича, Самарқанд шаҳри бўйича ИИО ФМБ томонидан олиб борилган тезкор суриштирув ишлари натижасида видеодаги ҳолатни содир этган ва уни тасвирга олган йигитлар топилган — улар Самарқанд шаҳридаги 45-мактабнинг 8-синф ўқувчилари.
«Компьютерхонага кетаётгандик. Ўртоғим А. менга видеога ол деб айтди. Нега видеога олишимни сўрадим. У эса кейин кўрасан дея, ўша кишини тепди», — дейди ҳолатни тасвирга олган йигитча.
Унинг сўзларига кўра, орадан беш кун ўтгач, у видеони Telegram орқали тарқатган.
«24 январь куни 19:00 ларда дўстим билан пайнетга бораётганимда ёши катта инсонни кўрдим. Шуни бориб тепдим, қилган ишимдан пушаймонман», — дейди йигит.
Ҳолат юзасидан терговга қадар текширув ҳаракатлари олиб борилиб, икки нафар вояга етмаган шахсларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига кўра (болаларни тарбиялаш ва уларга таълим бериш борасидаги мажбуриятларни бажармаслик) баённомалар расмийлаштирилган. Вояга етмаган болаларнинг ўзларига нисбатан эса Республика ўғил болалар таълим-тарбия муассасасига жойлаштиришлик учун жиноят ишлари бўйича Самарқанд шаҳар судига илтимоснома киритилган.
Ҳозирда улар вақтинчалик сақлаш учун Самарқанд вилоятидаги вояга етмаганларга ижтимоий-ҳуқуқий ёрдам кўрсатиш марказига жойлаштирилган.
