Шарқ аёллари макияжда кўзларга алоҳида урғу беришни маъқул кўради. Улар мукаммал стрелка чизишни ўрганганига анча бўлган. Кўзларнинг араб аёлларники сингари шаҳло кўринишига қандай қилиб эришиш мумкинлиги ҳақида маълумот бериб ўтамиз.
Суюқ подводка ўрнига сурма
Шарқ қизлари кўзларга стрелка чизишни суюқ подводка пайдо бўлишидан анча аввал ўрганиб улгурган. Ушбу мақсадда улар кукун ҳолига келтирилган қора, юмшоқ тош ва унга қўшилган канакунжутли аралашма — сурмадан фойдаланади. Қуриган аралашмадан учи ўткир қалам тайёрланади ва қарабсизки, подводка тайёр. Суюқ косметик воситадан фарқли равишда бундай сурма яхши суртилади ва оддий қаламдан ёғлироқ экани билан ўзига хос саналади. Қизиғи, замонавий брендларда ҳам сурмага муқобил вариант бор. Масалан, YSL томонидан тақдим қилинган Couture Kajal Eye Pencil худди араб аёллари фойдаланадиган гўзаллик воситасига ўхшайди. Таркиби замонавийроқ эканига қарамай, тузилиши ва фойдаланиш принципи сурмадан фарқ қилмайди.
Узун стрелка
Шарқ гўзаллари бошқалардан фарқли равишда стрелкани узун қилиб чизади. Ташқи учини чакка томон хиёл юқори қилиш кўзларнинг аслидан каттароқ кўринишига ҳисса қўшади. Бундай макияж, айниқса, кечки образ учун айни муддао саналади. Бунинг учун стрелкани кўзнинг ташқи бурчагида тугатмаслик, косметик восита ушлаган қўлни сал юқорига ҳаракатлантириш керак.
Сингдириш
Бироз сингдириш бу шарқона кўз бўяш усулининг «голливуд» вариантидан фарқи саналади. Европаликлар суюқ подводкадан мукаммал даражада текис қилиб чизишни афзал билса, араб қизлари чизилгандек турмаслиги учун бироз сингдиришга ҳаракат қилади. Стрелка чизгандан кейин кичкина, қаттиқ тен суртадиган чўткада подводканинг ташқи бурчаги устидан ҳаракатлантиринг. Қоп-қора бўлиб турмаслиги, шу билан бирга, шаклини йўқотмаслигига эътибор беринг.
Кўзнинг ички қисмини бўянг
Кўзларингиз тундек қоп-қора бўлишини истасангиз, киприклар ўсган қаторнинг ички қисмини бўянг. Бунинг учун бармоғингиз билан қовоқни бироз юқорига тортинг, иккинчи қўлингиздаги юмшоқ қаламни эса кўзнинг ички қисмига суртинг. Туш суртилганда ушбу усул киприкларни қалин кўрсатади.
Пастки қовоқни бўяшни ёддан чиқарманг
Шарқона макияжда кўзнинг пастки қисми бўялмай қолмайди. Қанчалик ғалати ва бачкана кўринмасин, факт фактлигича қолади: қовоқнинг пастки қисмига бўёқ суртиш кўзларни катта кўрсатади. Макияж меъёрда бўлиши учун бу сафар қалам эмас, тендан фойдаланиш тавсия қилинади. Ингичка чўтка ёрдамида тенни кўзнинг ташқи бурчагидан бошлаб ўртасигача суртинг. Кейин ташқи томонга йўналтириб енгил ҳаракатлар билан сингдиришга ҳаракат қилинг.
