«Муҳташам юз йил» тарихий драмаси аллақачон классикага айланиб улгурди. Сюжет XVI асрда Усмонлилар империяси ҳудудида яшаган тарихий шахсларнинг тақдирига асосланган, аммо сериалдаги ҳамма нарса ҳам ҳақиқат эмас. Сценарий муаллифлари баъзи қаҳрамонларни ўзлари ўйлаб топишган.
Сунбул оға
Ҳарам оғаси ҳақиқатан ҳам турк ҳарамларининг ажралмас қисми сифатида катта таъсирга эга бўлган. Аммо сериалда кўрсатилган ҳамма нарса ҳақиқат эмас. Ёрқин ҳазил туйғусига эга Сунбул оға тарихий шахс бўлмаган. Тўғрироғи, у Тўпқопида, фақат бутунлай бошқа даврда яшаган. Ёзувларга кўра, турк султонининг ҳарамида Иброҳим тентак (Кўсем султоннинг ўғли) қўл остида шундай исмли амалдор хизмат қилган. «Муҳташам юз йил»даги Хуррам султоннинг бунчалик яқин содиқ хизматкори бўлиши эса ҳақиқатга зид.
Кастилиялик Изабелла
Изабелла Фортуна — турклар томонидан асирга олинган гўзал малика, аслида у Сулаймон билан ҳеч қачон учрашмаган. Агар шундай бўлганда ҳам у султоннинг бувиси тенги бўларди, чунки у «Муҳташам юз йил»даги даврдан анча олдин яшаган. Аслида кастилиялик Изабелла Сулаймоннинг рақиби Карл V нинг бувиси эди, шунинг учун бундай романтик драмалар бўлмаган ва бўлиши ҳам мумкин эмас. Буларнинг барчаси сюжетнинг кескин ва қизиқарли бўлиши учун сценарий муаллифлари томонидан ўйлаб топилган.
Феруза хотун
Феруза султоннинг канизаги бўлиб, «Муҳташам юз йил»нинг 64-қисмида тасвирланган. Хуррам султоннинг ўзи уни сотиб олади ва ҳарамга хизматкор сифатида олиб келади. У қизи Меҳримоҳ билан дўстлашиб, жажжи Жаҳонгир билан тил топишиб, Хуррамнинг қалбини эритиб юборади. Аслида Феруза исмли канизак ҳеч қачон бўлмаган ва унинг барча интригалари фақат экранда эди. Бироқ мухлислар Жансу Дерани фильмдаги тимсоли учун шунчалик ёмон кўриб қолишадики, актрисани очиқчасига ҳақорат қилишгача боришган. Ҳатто сериал ижодкорларига хат ёзиб, уни лойиҳадан четлаштиришни талаб қилишган.
Содиқа хотун
Содиқа xотун — Сулаймон султоннинг яна бир канизакларидан бири бўлиб, Хуррамнинг асабларини ўйнатган бу маккора аёл ҳам сценарий муаллифларининг тўқимаси. Умуман олганда, кинодаги Хуррам султоннинг асосий рақиблари, Моҳидаврондан ташқари, ҳақиқатан ҳаётда бўлмаган шахслар. Улар сериални қизиқарли қилиш ва аксарият аёл томошабинларни асабийлаштириш учун ўйлаб топилган. Аммо Хуррам султоннинг қонуний хотини бўлгандан сўнг Сулаймон ҳарамни чиндан ҳам тарқатиб юборган.
Фахрия халфа
Аввалига Диана, кейинчалик Фахрия халфага айланган аёл Мустафонинг буйруғи билан Тўпқопига келиб қолган ўғри. Қиз яхшигина амалга эга бўлади: у бош халфа бўлиб, хазина ва ҳарамни бошқаришни ўз зиммасига олади. Дастлаб у Хуррамга қарши ишлатилади, аммо кейин у икки томонлама жосусга айланади. Аммо ҳаётда Роксолананинг бундай хизматкори бўлмаган, сценарий муаллифлари ҳарамдаги бир қатор воқеаларни кўрсатиш учун Содиқа халфа образини яратишган.
Меҳринисо султон
Меҳринисо шаҳзода Мустафонинг қонуний рафиқаси, Меҳмеднинг онаси ва Барбароссанинг қизи. Аслида Хизр Раиснинг болалари ҳақида ҳеч қандай маълумот йўқ – унинг меросхўри бўлмаган, айниқса, қиз фарзанд кўрмаган. Шаҳзода Мустафонинг хотини эса Румейса бўлган.
Моҳидаврон Султон Сулаймоннинг хотини бўлмаган
Сериалда Моҳидаврон қайта-қайта султон хоним деб аталади, лекин Сулаймон бу унвонни фақат Хуррам учун махсус киритган ва бундан олдин биронта аёл бунга лойиқ кўрилмаган. Султон хоним — бу унвонни фақат ҳукмдорнинг қонуний хотини, яъни никоҳидаги аёл олиши мумкин бўлган, лекин Моҳидаврон бундай эмас эди. Султон хоним подшоҳнинг ягона хотини деб ҳам аталган ва у жуда катта имтиёз ва кучга эга эди. Фақат волида султон (султоннинг онаси) мақоми ундан юқори бўлган. Моҳидаврон султоннинг севгилиси ва шаҳзода Мустафонинг онаси эди холос. Тарихда эса у Хуррамга уюштирган муваффақиятсиз суиқасдидан сўнг умрбод эски саройга сургун қилинган.
