 AQSh atom qurolli suvosti kemalarining 60 foizdan ortig‘i Tinch okeaniga tushirilgan, ular Rossiya, Xitoy va Shimoliy Koreyaga qarshi jang boshlashga tayyor holatda turishadi. Istalgan pallada 4–5 ta suvosti kemasi zudlik bilan yadro hujumi uyushtira oladi. Bu haqda "Atomchi olimlar byulleteni” jurnalida e’lon qilingan "AQShning yadroviy kuchlari, 2014” ma’ruzasida ma’lumot berilgan, deb yozadi "Rossiyskaya gazeta” nashri. Mashhur amerikalik ekspertlar – Xans Kristenson va Robert Norris tomonidan tayyorlangan hujjatda ta’kidlanishicha, ayni damda AQShda 7400 ga yaqin har xil turdagi atom portlovchi moddalari mavjud. Ulardan 2700 tasi xalqaro kelishuvlarga muvofiq yo‘q qilishga tayyorlanmoqda, 2530 tasi saqlab qo‘yilgan, 2120 tasi esa qurol-yarog‘lardadir. Shulardan 1152 tasi suvosti kemalaridagi qit’alararo raketalarda, 470 tasi – quruqlikdagi ballistik raketalarda, 300 tasi esa bombardimonchi samolyotlarda ekanligi ma’ruzada ma’lum qilingan.
Ko‘rinib turibdiki, AQSh yadro qurollarini asosan suvosti kemalariga joylashtirgan. Ularning ham 60 foizdan ko‘prog‘i Tinch okeani hududida patrullik faoliyati olib boradi. Bu esa zarur paytda yadro urushi boshlash, shuningdek, Xitoy, Shimoliy Koreya yoki Rossiyaning sharqiy qismiga yadro zarbalarini berishga mo‘ljallangan, deyiladi hujjatda.
Jangovar patrullik faoliyatiga jami 12 ta yadro qurolli suvosti kemasi jalb etilgan. Ulardan 8–9 tasi hamisha strategik ahamiyatli hududlarda yuradi. 4–5 ta suvosti kemasi esa avvaldan belgilab qo‘yilgan nishonlarga darhol hujum qilish uchun doimiy jangovar shaylikda turadi.
Ekspertlarning ogohlantirishlaricha, dunyoda mavjud yadro qurollari sayyoradagi barcha tirik mavjudotlarga doimiy tahdid solib turadi.
Manba: www.SheJoT.CoM - Saytdan olindi!
| 
