Коррупцияга қарши курашиш агентлиги бугунги кун ёшлари коррупция ҳақида қандай билим ва тасаввурга эгалиги, улар бу иллатга қарши курашишда ўз иштирокини қандай баҳолашини аниқлаш мақсадида Ўзбекистонда ёшларнинг фикр-мулоҳазаларини ифодалаш учун мўлжалланган ресурс — U-Report билан ҳамкорликда ёшлар ўртасида сўров ўтказди. Бу ҳақда агентлик матбуот хизмати хабар берди.

Натижаларга кўра, респондентларнинг:

    51 фоизи коррупциянинг моҳиятини тўғри тушунади;

    81 фоизи коррупцион ҳолатлар ҳақида хабар беришга тайёр;

    46 фоизи атрофдагилар пора олиш/пора беришига салбий муносабатда.

Шунингдек, сўров иштирокчиларининг 81 фоизи Ўзбекистонда коррупцияга қарши курашишга ёшларни жалб этиш коррупция даражасини пасайтиришга ёрдам беради, деб ҳисоблаган.

Ушбу сўров яна бир муҳим масалага аниқлик киритиб берган: бугунги кунда респондентларнинг 56 фоизи коррупцияга қарши курашишда иштирок этаётганини ҳис қилмоқда. Респондентларни пора беришдан тўхтатадиган 4 та асосий сабаб:

    эътиқодга зид келиши — 26 фоиз;

    ноқонунийлик — 25 фоиз;

    қадриятларга/тарбияга зид экани — 16 фоиз;

    жиноий жазодан қўрқиши — 9 фоиз.

Коррупцияга қарши курашиш учун масъул деб ҳисобланувчи топ-3 жавоблар:

    Коррупцияга қарши курашиш агентлиги (33 фоиз);

    «Мен ўзим» (27 фоиз);

    Ҳуқуқни муҳофаза қилиш идоралари (11 фоиз).

Таъкидланишича, агентлик шу каби аниқ ва асосли натижаларга таянган ҳолда ёшларни коррупцияга қарши курашишга самарали жалб этиш кўламини кенгайтиришни мақсад қилган.

Аввалроқ Ўзбекистонда 2021 йилда давлат органлари ва ташкилотларида ишловчи 3050 нафар ходим томонидан 4186 ҳолатда коррупцион жиноят қайд этилгани тўғрисида хабар берилганди. Ўтган йили коррупциянинг олдини олишга қаратилган 26 та норматив-ҳуқуқий ҳужжат лойиҳаси ишлаб чиқилган бўлиб, ҳозирда ушбу ҳужжатларнинг 8 таси қабул қилинган.