Bolaning har yili bir ota-ona uchun bir sovg'a va mo'jizadek o'tadi. Ilk qadam bosishi, gapirishi, birinchi chizgan odamchasi va boshqa minglab yutuqlari ota-onaga har kuni xursandchilik keltiradi. Lekin yillar o'tgan sari afsus ular sekin-sekin esdan chiqa boshlaydi.

Ularni unutmaslik kerak. Hayot naqadar shirin va baxtli o'tayotganini bilish uchun aynan yaxshi xotiralar kerak. Ularni doim yodimizda saqlash uchun bir o'yin bor. Uni har yili yangi yil arafasida o'tkazish lozim. Buning uchun:

O'ttiz birinchi dekabr kuni barcha oila a'zolari tugayotgan yildagi o'zlarining yoki farzandlarining yutuqlarini qog'ozga yozadilar. Bunga bolaning yurib ketgani, birinchi tishi chiqqani, ilk aytgan so'zi, birinchi "5" olgani, institutga kirgani, ota-onaning yaxshi ishga o'tgani, oylik oshgani, yangi uy olingani, yangi do'st topilgani, to'y bo'lgani, hatto pomidorlar arzon bo'lgani misol bo'lishi mumkin. Har bir oila a'zosi uchun alohida qog'oz ajratiladi;

Yutuqlar orasidagi eng yorqinlari suratlar bilan bezatilishi mumkin;

Barcha qog'ozlar oila a'zosining ismi yozilgan konvertga solinib yopishtiriladi. Endi bu konvertlar 1 yildan so'ng yangi yil arafasida ochiladi.

Yangi yil arafasida har bir oila a'zosi o'z konvertini ochmay turib 1 yil oldingi bo'lgan yutuqlarini eslashi kerak bo'ladi. Kichik bolalar uchun ota-ona bu vazifani bajarishi mumkin. 

Yutuqlarni eng ko'p eslay olgan (konvertdagi qog'ozdagi yozuvlar bilan solishtiriladi) oila a'zosi g'olib bo'ladi va oldindan ushbu o'yin uchun tayyorlangan yaxshi bir sovg'a bilan taqdirlanadi.

Bu o'yin nafaqat qiziqarlidir, balki bizga har yilimiz qanchalik unumli va yutuqlarga boy bo'lib o'tayognaligi haqida eslatib turadi. Inson psixologiyasi shundayki, u ko'proq salbiy holatlarni eslab qolish qobiliyatiga ega. Ijobiy holat va yutuqlarni esa unutib yuborish oson, bu o'yin esa bizga har kunimiz aslida naqadar yaxshilik va shirin lahzalarga boy ekanligini ko'rsatib beradi. Bayram kuni kayfiyat ko'tarilishiga ajoyib sabab bo'ladi.