Жалақудуқ туманида 2004 йилда туғилган қиз жонсиз туғилган чақалоғини кўчага ташлаб кетган. Жасадни биринчи бўлиб маҳаллада ўйнаб юрган болалар кўриб қолади. Қиз бир қанча муддат Андижон шаҳрида массажчилик билан шуғулланганлиги таъкидланмоқда.

Воқеа гувоҳларининг таъкидлашича, қизнинг отаси вафот этган. Бир нафар опаси турмушга чиқиб кетган. Ҳозирда онаси билан бирга истиқомат қилаётган бўлган.

Янги туғилган чақалоқни ташлаб кетилган жойидан биринчилардан бўлиб, қўшни болалар кўриб қолади ва чақалоқ жасадини кўрганлигини бувисига етказади.

«Набираларим айтганда ишонмадим. Кимдир қўғирчоғини ташлаб кетган бўлса керак деган хаёлга бордим. Бориб қарасам, ҳақиқатда чақалоқ қиз жасади экан. Уйдан рўмол олиб, устини ёпиб қўйдим». «Ҳомиладорлигини яшириш мақсадида қорнини боғлаб юрганини эшитдик» дейди воқеа гувоҳларидан бири.

Чақалоқ топилганда шилинган, қонталаш ҳолатда бўлган. Жасадни кўрган қўшнилар ички ишлар органларига мурожаат қилган. Иш туман прокуратураси томонидан назоратга олинган ва терговга қадар текширув ишлари амалга оширилмоқда.

Прокуратуранинг берган маълумотига кўра, 2022 йилнинг 21 январь куни соат 09:30 атрофида туманнинг Жанубий Оламушук шаҳарчаси Иттифоқ маҳалласидаги кўп қаватли уйлар жойлашган ҳудуддан янги туғилган (қиз жинсли) чақалоқнинг жасади ташқи тан жароҳатларисиз топилган. Мазкур ҳолат бўйича воқеа жойига туман прокурори, туман прокуратураси терговчиси, туман ИИБ бошлиғининг 1-ўринбосари, ЭКБ эксперти, вилоят суд тиббий экспертиза мутахассиси ҳамда тезкор-тергов гуруҳи аъзолари иштирокида ҳодиса жойи ва чақалоқ жасади кўздан кечирилган.

Олиб борилган терговга қадар текширув давомида мазкур чақалоқни Жанубий Оламушук шаҳарчаси, Навоий маҳалласида 2004 йилда туғилган Ш.М. қизи яшаш уйининг ёнидаги қурилиши тугалланмаган бино ичида 20 январь куни соат 23:00 атрофида ўлик ҳолатда туққан. Сўнгра чақалоқнинг жасадини ушбу бинонинг орқа томонига ташлаб кетган.

Чақалоқни ташлаб кетган қизнинг оиласи зиёли ҳисобланган. Қизнинг онаси таълим муассасаларидан бирида ўқитувчи бўлиб ишлайди. Маҳалла аҳли қизнинг оғир-босиқ эканлиги ва бир қанча муддат кўринмай қолганини, уйидан узоқда юрганини таъкидлади. Айтиш жоизки, ўқишга топшириб кира олмаган қиз Андижон шаҳрида массажчи бўлиб фаолият олиб борган.

Маҳалла фуқаролар йиғини масъулининг таъкидлашича, оила "Аёллар дафтари” ёки "Темир дафтар”га киритилмаган. Оиланинг яшаш шароити яхши. Муаммолар сабабли мурожаатлар қилинмаган. Қиз эса анча вақтдан бери деярли маҳаллада кўринмаган. Қиз оғир-босиқ бўлган. Мактабни тугатгач, Андижон шаҳрига кетган ва узоқ муддат давомида кўриниш бермаган.

Терговга қадар текширувдан келиб чиқиб, вояга етмаган қиз билан жинсий алоқага киришган шахс ҳам топилиб, тегишли тартибда қонуний жазо олиниши таъкидланмоқда.

Чақалоғини ваҳшийларча ташлаб кетган қиз ва унинг онаси хонадонида бўлмагани учун суҳбатлашиш имкони бўлмади.